Энх тайвныг тогтоох хууль

Улс орнуудын хооронд төрөл бүрийн шалтгааны улмаас том, жижиг зөрчилдөөнүүд гардаг. Хэрэв эдгээр зөрчилдөөнүүдийг шийдвэрлэхийн тулд зэвсэг ашиглавал энх тайван хэзээ ч тогтохгүй. Тиймээс улс орнууд заналхийлэл, цэргийн хүч хэрэглэхээс татгалзаж иргэдийн амь нас, эд хөрөнгөө хамгаалах хэрэгтэй.

Хүч хэрэглэх явдлыг зогсоохын тулд дайн үүсгэж буй үндсэн шалтгаан, нөхцөлийг үгүй болгох хэрэгтэй. . Бүх төрлийн зэвсэг, зэвсгийн үйлдвэрлэлүүд болон цөмийн бөмбөг гэх мэт зэвсгүүдийг аажмаар хорогдуулж, цэргийн зардлыг иргэдэд хэрэгцээтэй, хүний амьдралыг илүү цэцэглэн хөгжүүлэх газруудад буцаан олгох хэрэгтэй.

Улс орнууд энх тайвны төлөөлөгч болж, дэлхийн энх тайвныг бэхжүүлэхэд арга хэмжээ авах ёстой. Ард түмний тэгш эрх ба өөрсдийгөө тодорхойлох зарчмыг хүндэтгэх үндсэн дээр улс орнууд түрэмгийллийн үйлдлийг хориглож, нутаг дэвсгэртээ зэвсэгт хүч хэрэглэхийг зөвшөөрөхгүй байх ёстой. Улс орнууд бусад бүх улстай найрсаг харилцааг хөгжүүлж, маргаанаас урьдчилан сэргийлэх ёстой.

Улс орнууд өөр улсын хил хязгаарыг зөрчсөн түрэмгийллийг турхирах, төлөвлөх, бэлтгэх, эхлүүлэх, үйлдэхээс татгалзах ёстой. Ийм түрэмгийлэл нь цэрэг, улс төр, эдийн засгийн болон бусад ямар ч хэлбэрээр явагдах ёсгүй.

Улс орнууд аливаа улсыг хуваан бутаргах, хагаралдуулан талцуулах зорилготойгоор тухайн улсын дотоод хэрэгт хөндлөнгөөс оролцож болохгүй. Хэрэв тухайн улс хуваагдвал, хуваагдсан ард түмэнд өөрөө засан тогтнох эрхийг нь олгож, нэгдсэн засгийн газар байгуулахад нь туслахын тулд хамтран ажиллаж, харилцан яриа хэлэлцээр хийх ёстой.

Улс орнууд олон улсын маргааныг энхийн замаар шийдвэрлэх үүрэгтэй бөгөөд олон улсын шүүх зэрэг шүүхийн байгууллагын гаргасан аливаа шийдвэрийг хүндэтгэж, хэрэгжүүлэх ёстой.

Хэрэв аль нэг улсын эсрэг зэвсэгт халдлага гарвал өөрийгөө хамгаалах арга хэмжээг авч, нэн даруй түүнийгээ НҮБ-ын Аюулгүйн Зөвлөлд мэдээлж, өөрийгөө хамгаалж буй зэвсэгт хүчээ хязгаарлах ёстой. Өөрийгөө хамгаалах нэрийдлээр хэт их хүч хэрэглэх нь олон улсад хүлээн зөвшөөрөгдөхгүй.

Шашны зөрчилдөөн хурцадмал байгааг хүлээн зөвшөөрч, үүнийг шийдвэрлэхийн тулд хамтын хүчин чармайлтаа бэхжүүлэх хэрэгтэй. Улс орнууд шашин шүтэх эрх чөлөөг дэмжиж, ард иргэдээ хүлээцтэй байдалд төлөвшүүлэх ёстой. Мөн тухайн улсын засгийн газар , байгууллага, хувь хүний аль нь ч аливаа хүчирхийллийг зөвтгөх эсвэл хөхиүлэн дэмжих зорилгоор шашныг хэрэгсэл болгон ашиглахыг хориглоно.

Улс орнууд төрөл бүрийн шашин шүтлэг, үндэстэн угсаатнуудын хоорондох харилцан ойлголцлыг дэмжиж, аливаа хурцадмал байдлын үндсэн шалтгааныг тогтоохын тулд зөвлөлдөхийг уриалах ёстой. Шашны итгэл үнэмшил, угсаатны онцлогийг хүчирхийллийн шалтаг болгон ашиглахаас урьдчилан сэргийлэхийн тулд улс орнууд ийм үйлдлийг мөрдөн шалгаж, зохих шийтгэлийг өгөх ёстой.

Үйлдэл бодлоос эхтэй. Тиймээс энх тайвныг ойлгож, ярьж, дадлагажуулахын тулд дэлхийн ард иргэдэд энх тайвны боловсрол олгох ёстой. Энх тайвны боловсрол эзэмшсэн хүмүүс хуулийн албадлагагүйгээр ч энх тайвныг тогтоож, амар амгалан дэлхийг цогцлоож чадна.